Japonia ka rritur ndjeshëm kostot për të huajt që duan të qëndrojnë në vend, ndërsa aplikimi për rezidencë të përhershme tani kushton 200 mijë jen, rreth 1,270 dollarë, nga vetëm 10 mijë jen më parë.
Kjo përfaqëson një rritje 20-fish dhe vjen në kuadër të ndryshimeve të reja në politikën japoneze të emigracionit, transmeton Telegrafi.
Edhe procedurat e tjera janë shtrenjtuar. Nga 1 tetori, tarifa për zgjatjen ose ndryshimin e statusit të qëndrimit varion nga 10 mijë jen për qëndrime deri në tre muaj, deri në 75 mijë jen për periudha pesëvjeçare ose më të gjata, krahasuar me tarifën e mëparshme prej 6 mijë jenësh.
Rritjet shkaktuan radhë të gjata në zyrat e emigracionit në Tokio, ku aplikantët nxituan të kryenin procedurat përpara hyrjes në fuqi të tarifave të reja. Në zyrën kryesore të emigracionit në Tokio, pritja arriti deri në rreth 7 orë e gjysmë.
Por ndryshimet nuk lidhen vetëm me tarifat. Japonia ka shtrënguar edhe kriteret për marrjen e rezidencës së përhershme, duke vendosur kërkesa më të forta për të ardhurat, pagesat e pensioneve dhe, nga viti i ardhshëm, njohuritë bazë të gjuhës japoneze.
Sipas udhëzimeve të reja, aplikantët duhet të kenë të ardhura të qëndrueshme mbi nivelin mesatar të të ardhurave të familjeve japoneze të një madhësie të krahasueshme.
Nga prilli 2027, kriteret do të përfshijnë edhe kërkesa të reja për gjuhën japoneze dhe pensionin. Kjo ka nxitur rritjen e interesimit për kurset e gjuhës dhe provimet e njohurive japoneze.
Ndryshimet vijnë në një kohë kur numri i të huajve që jetojnë në Japoni po arrin nivele rekord. Në fund të vitit 2025, vendi kishte rreth 4.12 milionë banorë të huaj, 9.5% më shumë se një vit më parë dhe hera e parë që shifra kaloi 4 milionë.
Japonia, megjithatë, përballet me një paradoks: ndërsa po shtrëngon rregullat për të huajt, ekonomia e saj po mbështetet gjithnjë e më shumë te punëtorët e huaj për të përballuar mungesën e fuqisë punëtore, në një shoqëri që po plaket me shpejtësi.
Qeveria ka argumentuar se të ardhurat shtesë nga tarifat do të përdoren për të përballuar kostot administrative të menaxhimit të popullsisë së huaj, për programe të gjuhës japoneze dhe për forcimin e masave kundër qëndrimit të paligjshëm.
Ndërkohë, rritja e tarifave dhe shtrëngimi i kritereve kanë hapur debat mbi mënyrën se si Japonia do ta menaxhojë në të ardhmen një popullsi të huaj që po rritet me shpejtësi. /Telegrafi/