Njohësi i çështjeve të sigurisë, Avni Islami, ka thënë se kryeministri i Kosovës, Albin Kurti, është kthyer në një nga temat kryesore të fushatës politike në Serbi.
Në një reagim në Facebook, Islami shkruan se opozita serbe po i kujton presidentit Aleksandar Vuçiq humbjen e kontrollit mbi veriun e Kosovës, luftimin e grupeve kriminale dhe rastet që, sipas tij, dëshmojnë lidhjet ndërmjet pushtetit serb dhe Milan Radoiçiqit.
Sipas Islamit, Vuçiq, në anën tjetër, po i akuzon opozitën dhe studentët për bashkëpunim me Kurtin dhe për mbështetje nga Kosova.
Ai vlerëson se Kosova po shërben si pikë reference në rajon për qeverisjen, luftimin e korrupsionit dhe zhvillimin ekonomik, ndërsa në Serbi emri i saj po përdoret në diskurs nacionalist.
Islami përmend edhe sulmin terrorist të Banjskës, sulmin ndaj kanalit të Ibër-Lepencit dhe pretendimet për keqpërdorimin e institucioneve të sigurisë dhe fondeve të ndara nga Serbia në emër të Kosovës.