Ministri i Financave, Hekuran Murati, ka bërë të ditur se ka dorëzuar kallëzim penal në Prokurori ndaj kryetarit të Prishtinës, Përparim Rama, dhe bashkëpunëtorëve të tij në Komunën e Prishtinës lidhur me dyshimet për keqpërdorimin e 2.2 milionë eurove nga mjetet buxhetore.
Përmes një postimi në profilin e tij zyrtar në rrjetin social Facebook, Murati ka thënë se këto keqpërdorime janë konstatuar edhe nga auditimi i Zyrës Kombëtare të Auditimit.
Sipas tij, veprimet e dyshuara përfshijnë keqpërdorimin e detyrës zyrtare, falsifikimin e dokumentit zyrtar, mashtrimin dhe përdorimin e paautorizuar të pasurisë.
Murati ka shpjeguar se Ministria e Financave kishte nënshkruar marrëveshje financiare me Bankën Evropiane për Rindërtim dhe Zhvillim (BERZH), për një kredi prej pesë milionë eurosh, të cilat i ishin vënë në dispozicion Komunës së Prishtinës për investime në renovimin dhe ngrohjen e shkollave, çerdheve dhe institucioneve të tjera publike.
Megjithatë, sipas tij, rreth 44 për qind e këtyre mjeteve janë përdorur për pagesa të faturave që nuk kishin të bënin me projektin për të cilin ishte lidhur marrëveshja.
“Shuma prej 2.2 milionë eurove është ekzekutuar nëpërmjet 21 transaksioneve në kohë të ndryshme, pra nuk bëhet fjalë për ndonjë lëshim teknik apo gabim procedural, por me skemë keqpërdorimi të paramenduar. Disa prej projekteve në emër të të cilave janë bërë pagesa, as që kanë ekzistuar në buxhet”, shkroi Murati.
Ai ka pretenduar se mënyra dhe numri i transaksioneve tregojnë se nuk bëhet fjalë për një gabim të rastësishëm.
“Keqpërdorimi i 2.2 milionë eurove dhe fakti që kjo është bërë me paramendim në 21 transaksione të ndryshme, len të kuptohet që personat e përfshirë kanë qenë të bindur se janë të paprekshëm nga ligji”, ka deklaruar Murati.
Në fund, ministri i Financave i ka bërë thirrje Prokurorisë që të ndërmarrë veprime sa më shpejt.
“Ftoj prokurorinë që të veprojë shpejt e pa hezitim, sepse për çdo ditë që kalon, rritet rreziku që personat e dyshuar të vazhdojnë keqpërdorimet”, ka shkruar ai.
Deri në publikimin e këtij lajmi, në materialin e ofruar nuk ka qëndrim nga Përparim Rama ose Komuna e Prishtinës lidhur me pretendimet e ministrit.

