Erling Haaland është rikthyer në qendër të vëmendjes së gjigantëve spanjollë, me Barcelonën dhe Real Madridin që po e monitorojnë nga afër situatën e sulmuesit norvegjez te Manchester City.
Sipas raportimeve të publikuara në Angli, të dy klubet janë duke e përcjellë situatën në “Etihad”, në pritje të vendimit përfundimtar në lidhje me procesin financiar ndaj Man Cityt.
Një sanksion i rëndë sportiv ndaj Cityt mund të ndryshojë ndjeshëm situatën rreth disa prej yjeve të skuadrës.
Megjithatë, Haaland nuk është aktualisht në shitje dhe nuk ka asnjë indikacion se Manchester City po planifikon ta largojë atë.
Sulmuesi 26-vjeçar ka kontratë me klubin anglez deri në verën e vitit 2034, pasi rinovoi marrëveshjen në janar të vitit 2025 për dhjetë sezone.
Për këtë arsye, edhe në rast të një skenari ekstrem si rënia nga Liga Premier për shkak të një dënimi të mundshëm, Haaland nuk do të bëhej automatikisht lojtar i lirë.
Interesimi i Barcelonës dhe Real Madridit lidhet me zhvillimet rreth procesit financiar të Manchester Cityt.
Sipas raportimeve të fundit në Angli, komisioni i pavarur që po shqyrton rastin ka konsideruar të provuara 114 nga 115 shkeljet financiare për të cilat akuzohet klubi.
Megjithatë, vendimi përfundimtar dhe sanksioni ende nuk janë përcaktuar, ndërsa City ka të drejtë të apelojë.
Në mesin e skenarëve të mundshëm është përmendur edhe një zbritje e konsiderueshme pikësh, por deri më tani nuk ka asnjë dënim zyrtar.
Nëse Manchester City do të përballej me një sanksion të rëndë, situata e disa prej futbollistëve kryesorë mund të bëhej objekt diskutimi në tregun e transferimeve.
Haaland është emri kryesor që po monitorohet nga Barcelona dhe Real Madridi, ndërsa nga Anglia janë përmendur edhe Josko Gvardiol, Ayyoub Bouaddi, Elliot Anderson, Enzo Fernandez dhe Rayan Cherki si futbollistë që mund të jenë në radarët e klubeve spanjolle.
Megjithatë, për momentin bëhet fjalë vetëm për interesim dhe monitorim, jo për oferta apo negociata konkrete.
Për Barcelonën, një transferim i Haaland do të ishte veçanërisht i vështirë për shkak të kostos së mundshme të operacionit dhe kontratës së gjatë të norvegjezit.
Edhe Real Madridi ndodhet në të njëjtën situatë, pasi nuk ka aktualisht ndonjë marrëveshje apo negociatë të hapur për sulmuesin.
E ardhmja e Haaland mund të marrë një drejtim tjetër vetëm nëse zhvillimet rreth Manchester Cityt sjellin pasoja të rëndësishme sportive.
Deri atëherë, norvegjezi mbetet i lidhur me klubin anglez deri në vitin 2034. /Telegrafi/