Gazetari serb Branislav Kërstiq ka thënë se shtatori i vitit të ardhshëm do ta gjejë Kosovën me Asociacionin e Komunave.
“Jam i sigurt që deri në shtator të vitit të ardhshëm do të kemi asociacion në Kosovë dhe do të kemi qytetarët e kënaqur edhe në Kosovë e në Serbi… Sot jemi në një fillim të fundit të finales dhe do të vijë në shtator të vitit të ardhshëm, është konkluzion që më vjen nga burimet ndërkombëtare”, ka thënë Kërstiq për Klan Kosova.
Sipas tij, asociacioni është realiteti i të ardhmes së Kosovës. Ai, siç tha Kerstiq, do t’i mbrojë të drejtat kolektive të serbëve në Kosovë.
Kërstiq tha se Beogradi zyrtar do të insistojë në marrëveshjet e viteve 2013 e 2015.
Ai tha se pala kosovare e ajo serbe sot janë në një pozitë që nuk kanë mundësi të refuzojnë marrëveshjen. Sipas tij, ata sot do të caktojnë datën kur do të fillojnë zbatimin e marrëveshjes.
Gazetari serb tha se Beogradi e ka vetëm një kusht për pavarësinë e Kosovës dhe ai është asociacioni.