Deputeti i Lidhjes Demokratike të Kosovës (LDK), Arben Gashi, ka shprehur qëndrimin e tij rreth organizimit të marshit në Kosovë në përkrahje të ish-krerëve të UÇK-së.
Ai ka thënë se ende nuk ka qartësi se për çfarë qëllimi janë organizuar këto manifestime. Megjithatë, ai ka theksuar se është e vërtetë se ka ekzistuar dhe vazhdon të ekzistojë një organizim konspirativ i armiqve të Kosovës kundër shtetit të Kosovës dhe Ushtrisë Çlirimtare të Kosovës (UÇK)
Gashi gjithashtu ka kritikuar menaxhimin e situatës nga institucionet e Kosovës, duke përmendur se shumica e atyre që kanë qenë në qeverisje kanë përgjegjësi për këtë gjendje të kompleksuar. Ai ka vlerësuar se situata është komplekse dhe jo vetëm njëanshme, dhe se është e nevojshme që drejtësia të ndjekë rrugën e saj.
“Unë ende sot nuk e kam të qartë qëllimin e manifestimin. E vërteta është që ne është dashtë ta shohim situatën gjithëpërfshirëse, çka ka ndodh, pse jemi në këtë fazë, pse ata njerëz janë në gjykatë, pse është kriu ajo gjykatë. Elementi parë është që është e vërtetë që ka pas dhe ka edhe sot një organizim konspirativ të armiqve të Kosovës kundër Kosovës, shtetit të Kosovës dhe UÇK-së. Ka pasur gjithmonë, armiqtë këtë punë e kanë. Çështja e dytë e rëndësishme është se si kanë vepru institucionet të Kosovës se si e kanë trajtuar këtë punë” – ka thënë ai.
“…dhe, fatkeqësisht në qeverisje kanë qenë pothuajse të gjithë që kanë qenë atje në një formë ose tjetër” – tha mes tjerasha ai.
“Situata është shumë komplekse, nuk është vetëm e njëanshme por në këtë rast faza ku jemi ne, si LDK vlerësojmë se duhet t’i lihet drejtësia drejtësisë.” – ka thënë deputeti i LDK-së Arben Gashi në “Pressing”.
