Eliminimi i Barcelonës nga Liga e Kampionëve kundër Atletico Madrid ka shkaktuar një sërë reagimesh, ku ish-lojtari i kombëtares franceze, Christophe Dugarry, është ndër më të ashprit.
Kampioni i botës i vitit 1998 nuk mungoi në kritikat e tij ndaj të riut Lamine Yamal, duke i thënë se duhet të tregojë më shumë sesa thjesht talent për t’u konsideruar lojtar i klasit botëror.
Dugarry beson se Yamal foli shumë dhe tregoi shumë pak në momentet kyçe. Edhe pse sulmuesi i ri shënoi në fillim të ndeshjes së dytë, francezi pretendon se ai ishte i padukshëm pas kësaj.
“Ai shënoi në minutën e katërt. E çfarë pastaj? Kjo tregon se ai nuk është kandidat për Topin e Artë”, ka thënë fillimisht Dugarry, duke shprehur qartë zhgënjimin e tij me kontributin e tij.
Ai shkoi një hap më tej në analizën e tij, duke e krahasuar atë me Ousmane Dembele.
“Dembele do të kishte shënuar disa gola më shumë me siguri. Lamine i vogël pati momentin e tij të lavdisë dhe asgjë më shumë”.
Dugarry mendon se egoja e tij është shumë e madhe
Ndërsa pranon se talenti nuk është në diskutim, Dugarry thekson se nuk është i mjaftueshëm. “Ai padyshim që ka talent, por është larg të qenit një nga më të mirët në botë”, shtoi francezi.
Kritika më e drejtpërdrejtë ishte për mentalitetin e futbollistit të ri spanjoll.
“Nëse do të flasësh shumë, sigurohu që skuadra jote të fitojë. Në çfarë bote jeton? Në botën reale, nuk bën asgjë. Nuk jam i bindur se Barcelona e meritonte të kalonte tutje duke pasur parasysh performancën e tij. Ai ka një ego të fryrë”, përfundoi ish-sulmuesi i njohur.
Simeone e provokoi Yamalin, i tha të “flejë”: Doni që unë të kem frikë nga një lojtar që kryen truke
Yamal ka qenë një lojtar kyç për Barcelonën këtë sezon, duke shënuar 23 gola dhe duke dhënë 18 asistime në 44 paraqitje në të gjitha garat.
Ekipi i tij u eliminua nga Kupa e Mbretit dhe Liga e Kampionëve nga Atletico Madrid, por ata pritet ta fitojnë ligën, duke pasur parasysh avantazhin e tyre prej nëntë pikësh nga tetë ndeshjet prej fundit. /Telegrafi/