Këngëtarja, Blerina Matraku, ka folur për herë të parë në një intervistë televizive për marrëdhënien e saj me kompozitorin Adrian Hila, pas publikimit të videove intime që kanë qarkulluar ditët e fundit në rrjet.
Në një bisedë me Ori Nebijajn në emisionin Goca dhe Gra, artistja ka rrëfyer detaje nga raporti me kompozitorin, duke pranuar se kishte qenë e dashuruar dhe se për një kohë të gjatë e kishte idealizuar figurën e tij.
Matraku është shprehur se ndihet e tradhtuar dhe e përdorur, duke pretenduar se ishte shndërruar në një figurë që vetë Hila kishte ndërtuar.
Ajo ka pranuar se kompozitori kishte ndikuar edhe në zhvillimin e saj profesional, çka e kishte bërë të krijonte një besim të madh ndaj tij.
Sipas këngëtares, pikërisht ky besim e bënte të paimagjinueshme papërgjegjshmërinë që ajo pretendon se është treguar lidhur me kamerat në ambientet private.
Matraku ka sqaruar se nuk kishte qenë në dijeni të ekzistencës së kamerave të sigurisë, pasi mendonte se bëhej fjalë për një sistem alarmi, të vendosur pas disa vjedhjeve.
“Unë e dija sistem alarmi. Nuk e dija që ishte kamerë sigurie, meqë kishte pasur vjedhje”, ka deklaruar ajo.
Gjatë intervistës, këngëtarja ka kujtuar edhe një bisedë të vitit 2022, kur Hila i kishte treguar për planet për t’u shkëputur nga muzika dhe për të krijuar një ambient të ri në Tiranë, ku do të kishte edhe studion e tij personale.
Sipas saj, kompozitori i kishte shpjeguar se dëshironte ta kthente atë hapësirë në një vend ku mund të priste njerëzit e afërt dhe miqtë që kishte për zemër.
“Ti e ke derën hapur tek unë”, ka kujtuar Matraku t’i kishte thënë Hila. Ajo ka treguar se në atë moment ishte prekur emocionalisht, pasi e kishte interpretuar ftesën si një shenjë të miqësisë dhe vlerësimit që kompozitori kishte për të.
Një tjetër çështje e rëndësishme e rrëfimit lidhej me statusin martesor të Hilës. Blerina ka deklaruar se gjatë marrëdhënies së tyre kishte besuar se kompozitori ishte i ndarë nga bashkëshortja dhe se, kur kishte kuptuar se kjo nuk ishte e vërtetë, kishte vendosur të tërhiqej nga raporti.
“Jam e penduar për marrëdhënien që krijova me këtë njeri”, është shprehur këngëtarja, duke shfaqur zhgënjimin për atë që ka ndodhur.
Rrëfimi vjen pas reagimeve të mëparshme publike të artistes, e cila kishte kërkuar ndalimin e shpërndarjes së materialeve intime, duke folur edhe për pasojat e rënda që kjo situatë ka pasur në jetën e saj personale dhe familjare.
Përmes intervistës me Ori Nebijajn, Blerina Matraku ka ndarë versionin e saj më të plotë të historisë, duke folur për ndjenjat, besimin që kishte te kompozitori dhe zhgënjimin që, sipas saj, e shoqëron sot. /Telegrafi/
– YouTube www.youtube.com