Konsullata e Përgjithshme e Republikës së Kosovës në Nju-Jork ka organizuar shfaqjen e filmit “DUA”, propozimit zyrtar të Kosovës për çmimin Oscar në kategorinë “Filmi më i mirë ndërkombëtar”.
Në këtë ngjarje morën pjesë përfaqësues diplomatikë të shteteve anëtare të OKB-së, zyrtarë amerikanë, filmdashës dhe bashkatdhetarë shqiptarë.
Të pranishmit i përshëndeti ambasadori Blerim Reka, ndërsa pas shfaqjes u zhvillua një diskutim për filmin, ku folën regjisorja Blerta Basholli dhe aktorët Yllka Gashi e Kushtrim Hoxha.
Filmi “DUA”, përmes këndvështrimit të një vajze të re, sjell një histori të vërtetë të fëmijërisë në Kosovë, në prag të luftës çlirimtare kundër pushtimit serb.
Përmes kësaj historie, filmi trajton kujtesën kolektive dhe përvojat e një periudhe të vështirë të Kosovës, duke i përcjellë ato edhe te publiku ndërkombëtar.
Konsullata e Përgjithshme e Kosovës në Nju-Jork ka shprehur mirënjohje për të gjithë pjesëmarrësit, duke i uruar sukses filmit në rrugëtimin drejt Oscar-it./Telegrafi/