Çdo trajner lë një përshtypje të qëndrueshme te lojtarët e tij dhe Robert Lewandowski mori një mësim të vlefshëm nga Pep Guardiola gjatë dy sezoneve të tyre së bashku te Bayern Munich.
Sulmuesi polak e pranoi këtë në një intervistë me Sky Sports, ku ai rishikoi karrierën e tij dhe gjithashtu ofroi disa të dhëna rreth të ardhmes së tij, e cila mbetet e pasigurt.
Lewandowski kujton bisedat që pati me Pepin në Gjermani rreth taktikave, teksa zbuloi diçka shumë interesante rreth një këshille.
“Një sulmues duhet të dijë se ku duhet të jetë , ku do të jetë topi, sepse vetëm ti e di këtë në fushë. Ke atë lloj intuite”, ka thënë fillimisht Lewandowski.
“Më kujtohet një bisedë me Pep Guardiolën shumë vite më parë. Po flisnim për taktikat. Dhe ai më tha se mund të më ndihmonte të futja topin në zonë, por se nuk duhet të dëgjoja kurrë ndonjë trajner që përpiqej të më thoshte nëse duhet të shkoja në shtyllën e parë apo në shtyllën e dytë”.
“Ai më tha, ‘Nga ajo që kam parë, e di saktësisht se ku duhet të shkosh’. Kam atë instinkt, atë ndjenjë të brendshme që më lejon të di saktësisht. Me Pepin, fillova ta kuptoj futbollin në një mënyrë tjetër. Jo si lojtar, por më tepër si trajner”, përfundoi ylli polak. /Telegrafi/