CEO i Tesla-s, Elon Musk, deklaroi se do të duhen disa vite para se modelet e reja të drejtimit autonom të Nvidia-s të përbëjnë konkurrencë serioze për teknologjinë Full Self-Driving (Supervised) të Tesla-s.
Reagimi i tij erdhi pas prezantimit të Alpamayo nga CEO i Nvidia-s, Jensen Huang, gjatë konferencës CES në Las Vegas.
Musk tha se teknologjia e drejtimit autonom është “relativisht e lehtë” të arrijë 99% siguri, por shumë e vështirë të zgjidhet “problemi” i situatave të rralla.
Dhe sipas tij, prodhuesit tradicionalë të makinave do të vonohen në integrimin masiv të kamerave dhe kompjuterëve të AI-së.
“Kompanitë e vjetra të makinave nuk do t’i projektojnë kamerat dhe kompjuterët e inteligjencës artificiale në makinat e tyre në shkallë të gjerë deri disa vite pas kësaj”, tha ai në një postim. “Pra, ky është ndoshta një presion konkurrues mbi Teslën pas 5 ose 6 vitesh, por ndoshta edhe më gjatë”.
Huang vlerësoi sistemin FSD të Tesla-s si “të nivelit botëror”, duke theksuar se Nvidia ofron platforma teknologjike për prodhues të tjerë dhe nuk prodhon vetë automjete.
FSD mbetet thelbësor për strategjinë afatgjatë të rritjes së të ardhurave të Tesla-s. /Telegrafi/