Pas më shumë se katër vjetësh në kërkim nga Policia, pronari i kompanisë “Smart Marketing”, Rinor Konjusha, i dyshuar në rastin e keqpërdorimeve me një kontratë prej 180 mijë eurosh në Telekomin e Kosovës, është paraqitur në Polici. Ai është intervistuar në prani të avokatit dhe më pas është ndaluar për 48 orë.
Konjusha kërkohej në lidhje me hetimet për një marrëveshje të lidhur më 8 nëntor 2018 ndërmjet Telekomit të Kosovës dhe kompanisë “Smart Marketing”, për shfrytëzimin e hapësirave reklamuese, në vlerë prej 180 mijë eurosh.
Rasti ishte bërë publik në mars të vitit 2022, kur Drejtoria për Hetimin e Krimeve Ekonomike dhe Korrupsionit, në koordinim me Prokurorinë Themelore në Prishtinë, kishte arrestuar disa zyrtarë të Telekomit të Kosovës, shkruan Insajderi.
Ata dyshoheshin se, në bashkëkryerje, kishin keqpërdorur detyrën zyrtare gjatë zbatimit të marrëveshjes me kompaninë private.
Në atë kohë, Konjusha, si pronar i “Smart Marketing”, nuk ishte paraqitur në Polici dhe kishte mbetur në kërkim.
Pas paraqitjes së tij të mërkurën, hetuesit e kanë intervistuar në prani të avokatit mbrojtës, ndërsa me vendim të Prokurorisë Themelore në Prishtinë është urdhëruar ndalimi i tij për 48 orë.
Rasti lidhet me dyshimet për keqpërdorim dhe mashtrim në prokurim gjatë viteve 2018–2019.