Një problem kritik i sigurisë në gjuhën e programimit PHP ka detyruar institucione publike dhe biznese në disa vende të botës të mbyllin përkohësisht faqet e tyre të internetit, si masë parandaluese ndaj sulmeve të mundshme kibernetike.
E lidhur me këtë kanë reaguar edhe Ministria e Digjitalizimit dhe Administratës Publike e Republikës së Kosovës, duke dhënë rekomandime për sigurinë kibernetike.
“Ministria e Digjitalizimit dhe Administratës Publike dhe Kos-CERT/ Njësia Nacionale për Siguri Kibernetike rekomandojnë organizatat që përdorin #PHP në faqet e internetit, aplikacionet ueb dhe shërbimet online, se duhet të aplikojnë përditësimet më të fundit të sigurisë”, thuhet në njoftim.
Ndryshe, dobësia në PHP prek një teknologji të përdorur gjerësisht për ndërtimin dhe funksionimin e faqeve të internetit. Për shkak të përhapjes së saj, problemi mund të ketë pasoja për një numër të madh institucionesh dhe biznesesh që mbështeten në këtë teknologji.
Si masë parandaluese, disa vende kanë ndërprerë përkohësisht shërbimet online, në pritje të instalimit të përditësimeve të nevojshme të sigurisë.
Megjithatë, vlerësimi kritik tregon seriozitetin e dobësive dhe rrezikun që ato paraqesin, por nuk nënkupton domosdoshmërish se sistemet e prekura janë sulmuar ose se të dhënat e përdoruesve janë komprometuar. /Telegrafi/