Kolagjeni është një proteinë e rëndësishme që i jep lëkurës strukturë dhe elasticitet.
Me kalimin e moshës, prodhimi i tij natyral në trup ulet, ndaj ushqyerja mund të luajë një rol në furnizimin e organizmit me aminoacidet dhe lëndët ushqyese që nevojiten për sintezën e kolagjenit.
Ndër ushqimet që mund të mbështesin këtë proces janë pula, peshku dhe të bardhat e vezëve. Edhe pse lëngu i kockave shpesh konsiderohet burim i mirë kolagjeni, studimet tregojnë se sasia e kolagjenit që përmban mund të jetë më e ulët nga sa mendohet dhe provat për përfitimet e tij mbeten të kufizuara.
Ushqimet e pasura me vitaminë C janë gjithashtu të rëndësishme, pasi kjo vitaminë ndihmon në prodhimin e kolagjenit. Agrumet si portokalli, limoni dhe grejpfruti, si dhe manaferrat, frutat tropikale, domatet dhe specat janë burime të mira të saj.
Perimet me gjethe jeshile mund të ofrojnë gjithashtu antioksidantë dhe lëndë të tjera ushqyese që mbështesin shëndetin e lëkurës.
Në listë përfshihen edhe hudhra, fasulet dhe arrat indiane. Fasulet përmbajnë lizinë, një aminoacid të nevojshëm për prodhimin e kolagjenit, ndërsa arrat indiane ofrojnë zink dhe bakër. Hudhra përmban squfur, mineral që merr pjesë në procesin e sintezës së kolagjenit.
Në përgjithësi, nuk ekziston një ushqim i vetëm që garanton rritjen e kolagjenit. Një dietë e larmishme me proteina, fruta, perime dhe ushqime të pasura me vitaminë C, zink dhe vitaminë E mund t’i sigurojë trupit lëndët e nevojshme për këtë proces.
Gjithashtu, këshillohet të kufizohet konsumimi i tepërt i sheqerit dhe karbohidrateve të rafinuara.
Megjithëse disa studime mbi kolagjenin ushqimor dhe suplementet janë premtuese, nevojiten më shumë kërkime për të përcaktuar qartë ndikimin e tyre në shëndetin dhe pamjen e lëkurës. /Telegrafi/
