Arsenali po pozicionohet si favorit për të transferuar anësorin e Newcastle United, Anthony Gordon, gjatë verës, me raportimet që tregojnë se “Topçinjtë” shpresojnë ta sigurojnë anglezin për rreth 75 milionë funte.
Sipas gazetarit të The Sun, Charlie Wyett, Arsenali aktualisht ka avantazh ndaj rivalëve Liverpool dhe Manchester United në këtë garë.
Klubi nga veriu i Londrës beson se Gordon do të ishte i hapur për një kalim në Emirates, duke e parë atë si një përforcim kyç për të rritur opsionet në repartin ofensiv.
25-vjeçari është shndërruar në një nga sulmuesit anësorë më dinamikë në Liga Premier që prej transferimit te Newcastle nga Everton në janar të vitit 2023. Këtë sezon, Gordon ka regjistruar 15 gola dhe 5 asistime në 38 paraqitje në të gjitha garat, duke treguar shpejtësinë, depërtimin dhe aftësinë realizuese.
Interesimi i Arsenalit përputhet me strategjinë e tyre për të afruar lojtarë të provuar në Liga Premier që mund të kenë ndikim të menjëhershëm.
Edhe pse ende nuk ka oferta zyrtare, vlerësimi i raportuar prej 75 milionë funtesh është nën çmimin që zakonisht kërkon Newcastle për yjet e tij, gjë që mund të hapë derën për negociata nëse londinezët veprojnë herët./Telegrafi