Federico Chiesa mund të largohet nga Liverpooli dhe të rikthehet në Serie A, pasi po e ka të vështirë të gjejë hapësira te skuadra angleze.
Sulmuesi italian nuk është pjesë e planeve kryesore të trajnerit Andoni Iraola për këtë sezon. Për më tepër, ai është lënë jashtë listës së Liverpoolit për Ligën e Kampionëve dhe ka vuajtur nga një lëndim muskulor që e ka mbajtur jashtë fushave në fillim të sezonit.
Sipas raportimeve nga Italia, Interi, Bologna dhe Lazio janë klubet që po e monitorojnë situatën e 28-vjeçarit dhe mund të tentojnë transferimin e tij gjatë afatit kalimtar të janarit, në formë huazimi.
Chiesa dëshiron të luajë rregullisht dhe të rikthehet në nivelin që e kishte para aventurës në Angli. Minutat e pakta te Liverpooli e kanë vështirësuar edhe synimin e tij për t'u rikthyer në Kombëtaren e Italisë.
Megjithatë, deri tani nuk raportohet për një marrëveshje të konkretizuar me ndonjërin prej klubeve të interesuara.
Ish-futbollisti i Juventusit iu bashkua Liverpoolit në vitin 2024, por aventura e tij në Angli është karakterizuar nga mungesa e vazhdimësisë dhe problemet fizike.
Një rikthim në Itali mund t'i japë Chiesas mundësinë për ta ringjallur karrierën dhe për të fituar sërish një rol të rëndësishëm në futbollin italian. /Zëri