Një kontroll i Policisë Kufitare në Fushë Kosovë ka zbuluar një sasi të konsiderueshme mallrash për të cilat dyshohet se janë sjellë nga Maqedonia e Veriut pa dokumentacion që dëshmon importin e ligjshëm.
Rasti është regjistruar më 17 tetor, rreth orës 22:40, kur njësitë e Sektorit të Hetimeve të Policisë Kufitare kanë ndaluar për kontroll një automjet transportues me targa vendore, ku ndodheshin dy persona, shkruan lajmi.net.
Sipas raportit 24-orësh të Policisë, në automjet janë gjetur barna, produkte higjienike, bizhuteri, veshmbathje, pajisje teknologjike, kompjuterë, llaptopë dhe telefona celularë.
Gjatë intervistimit, të dyshuarit kanë deklaruar se mallrat i kishin sjellë nga Maqedonia e Veriut, por nuk kanë paraqitur dokumente që dëshmojnë importin e tyre të ligjshëm.
Përveç mallrave, si provë materiale është sekuestruar edhe automjeti transportues.
Me vendim të prokurorit, të dyshuarit janë dërguar në mbajtje, nën dyshimet për prodhim dhe shpërndarje të produkteve të dëmshme mjekësore, kontrabandim me mallra dhe shmangie nga pagesa e tarifave doganore ose akcizore. /Lajmi.net/