Me financat e Barcelonës të shtrënguara deri në kufijtë maksimalë, inteligjenca artificiale i ka ofruar drejtorit sportiv Deco një listë me gjashtë qendërmbrojtës që mund të jenë të disponueshëm për transferim në formë huazimi gjatë afatit kalimtar të janarit. Secili prej tyre shihet si një zgjidhje e mundshme për mbrojtjen e Hansi Flickut në pjesën vendimtare të sezonit.
Prioriteti i Barcelonës është i qartë: transferimi i një qendërmbrojtësi në formë huazimi deri në fund të sezonit. Kufiri i pagave të klubit katalunas nuk lejon shpenzime më të mëdha se katër milionë euro, duke përjashtuar çdo investim të rëndësishëm, përveç rastit kur fillimisht realizohet ndonjë shitje.
Në krye të listës, sipas gazetës Sport, ndodhet braziliani Vitor Reis. Mbrojtësi i Manchester Cityt shquhet për aftësitë me topin dhe tashmë e njeh mirë futbollin spanjoll, pasi më parë ka luajtur në La Liga me Gironën.
Një huazim gjashtëmujor për 20-vjeçarin Reis do të ishte një zgjidhje që mund t’u përshtatej të gjitha palëve. Megjithatë, mungesa e përvojës në ndeshjet e nivelit të lartë shihet si një nga dobësitë e tij.
Në vendin e dytë është Lucas Beraldo i Paris Saint-Germainit. Braziliani 22-vjeçar është mbrojtës me këmbë të majtë, ka aftësi të mira në shpërndarjen e topit dhe është mësuar të luajë me vijë të lartë mbrojtëse.
Pengesa kryesore për Barcelonën do të ishte bindja e PSG-së që ta huazojë një futbollist te një rival i drejtpërdrejtë në garat evropiane.
Emri i tretë është Piero Hincapie i Arsenalit. Mbrojtësi 24-vjeçar konsiderohet si profili që i përshtatet më së miri filozofisë së Hansi Flickut. Ai kombinon shpejtësinë me agresivitetin dhe mund të luajë si qendërmbrojtës, ashtu edhe në krahun e majtë.
Megjithatë, kontrata e tij me Arsenalin është e vlefshme deri në vitin 2031, gjë që e bën një huazim jashtëzakonisht të vështirë.
Në listë është edhe Jorrel Hato i Chelseat. Holandezi 20-vjeçar vlerësohet për inteligjencën taktike, shpejtësinë në nisjen e aksioneve dhe aftësitë që përputhen me kërkesat e Barcelonës. Problemi është se Chelsea e konsideron atë një investim afatgjatë dhe nuk ka shumë arsye për ta lënë të largohet.
Dy emrat e fundit lidhen me mundësitë që mund të krijohen nga situatat kontraktuale.
I pari është Fikayo Tomori i Milanit, kontrata e të cilit skadon në qershor të vitit 2027. Kjo mund t’i hapë rrugë bisedimeve për një huazim. Shpejtësia dhe përvoja ndërkombëtare e mbrojtësit 28-vjeçar përputhen me kërkesat e Flickut.
Flick kërkon transferimin e yllit të Bayern Munichut në janar, por përballet me një pengesë të madhe
Ndërsa emri i fundit është Lisandro Martinez i Manchester Unitedit. Argjentinasi 28-vjeçar është më me përvojë nga të gjashtë kandidatët dhe shihet si një lider i lindur. Ai ka këmbë të majtë të fortë, është i aftë në ndërtimin e aksioneve dhe ka ngjashmëri me profilin e Inigo Martinezit.
Kontrata e tij me Unitedin përfundon në vitin 2027, me mundësi vazhdimi edhe për një sezon tjetër. Megjithatë, paga e lartë dhe problemet e shpeshta me lëndime janë dy pengesat kryesore për realizimin e këtij transferimi./Telegrafi/