Tashmë ka filluar numërimi së prapthi deri në ditën e takimit të radhës në rundin e ri të bisedimeve ndërmjet kryeministrit të Republikës së Kosovës, Albin Kurti dhe presidentit serb, Aleksandar Vuçiq, më 18 mars në Ohër të Maqedonisë së Veriut. Çështja që po diskutohet më së shumti është Asociacioni.
Para disa ditësh, kryeministri i Kosovës, Albin Kurti, tha është duke i trajtuar 15 modelet evropiane të ofruara nga Bashkimi Evropian për krijimin në Kosovë të Asociacionit të komunave me shumicë serbe.
Kurti, i cili deri më tani ka kundërshtuar fuqishëm krijimin e Asociacionit njëetnik, para disa javësh shpalosi para deputetëve të Kuvendit të Kosovës gjashtë kushtet për formimin e tij.
Por a i ndryshoi kryeministri Kurti qëndrimet për Asociacionin?
Gjatë fushatës zgjedhore për zgjedhjet nacionale të 6 tetorit 2019, Kurti thoshte se Zajednica është shpartalluar dhe do të varrosej ditën e zgjedhjeve.
“Asociacioni i komunave me shumicë serbe praktikisht ka vdekur. Vendimi i Gjykatës Kushtetuese ka thënë që asnjëri nga shtatë kapitujt nuk është në përputhje me Kushtetutën. Nuk ka më Asociacion. Asociacioni do të varroset më 6 tetor, ata që e kanë mbështetë shkojnë bashkë me të. Le t’ia bëjnë qarën ata. Sa për neve kryhet kjo punë. Aktgjykimi e ka shpartallu Zajednicën. Ajo është kot.“, thoshte Kurti.
Gazetari Vehbi Kajtazi e ka shpërndarë këtë deklaratë dhe ka shkruar se Kurti që sot është kryeministër, dikur e kishte “varrosur” Zajednicën.
“Brenda 48 oresh do te ulet me Vuçiqin per ti dhene forme jo veç zajednices, por edhe autonomise per serbet. Degjojeni dhe qeshni me qeshjen e shokut Albin!”