Për më shumë se një dekadë, Kombëtarja e Uellsit ka bërë diçka të pazakontë para çdo ndeshjeje: fotografia e skuadrës nuk është kurrë e rregulluar siç duhet.
Tradita u rikthye në vëmendje para ndeshjes së Ligës së Kombeve ndaj Portugalisë, kur lojtarët e Craig Bellamyt u rreshtuan në mënyrë të pazakontë përpara tifozëve në stadiumin “Estadio Jose Alvalade”.
Mes kapitenit Ben Davies dhe Jordan James kishte një hapësirë të madhe, ndërsa David Brooks rikrijoi një pozicionim të famshëm të Ashley Cole, duke lënë një tjetër boshllëk të madh mes tij dhe Neco Williams.
Por pas kësaj fotografie të çuditshme fshihet një arsye edhe më interesante.
Gjithçka nisi në vitin 2016, kur Joe Ledley tregoi se lojtarët e Uellsit nuk ishin shumë të mirë në organizimin e fotografisë së skuadrës. Në vend që ta rregullonin problemin, ata vendosën ta përqafonin kaosin.
Dhe më pas erdhi suksesi.
Uellsi zhvilloi një Evropian fantastik në vitin 2016, duke arritur deri në gjysmëfinale, ndërsa fotografia e çrregullt nisi të shihej si një lloj rituali fati për ekipin.
“Thjesht menduam se mund ta linim njësoj. Nuk ushtrojmë. Flasim brenda grupit dhe vendosim se çfarë do të bëjmë. Ka qenë me fat për ne, ndaj nuk mendoj se do të kemi ndonjëherë një fotografi normale”, kishte shpjeguar Ledley.
Që nga atëherë, Uellsi ka vazhduar traditën, madje në disa raste lojtarët janë rreshtuar në formacione krejtësisht të çuditshme.
Një foto e “prishur” që për Uellsin nuk është aspak rastësi, por një traditë që besohet se sjell fat./Telegrafi/