Shefi i Grupit Parlamentar të LDK-së, Arben Gashi, ka thënë se ende nuk e ka të qartë qëllimin e Marshit për Drejtësi.
Sipas tij, arsyet që kanë ardhur deri në krijimin e Gjykatës Speciale janë të ndryshme dhe ato duhet të analizohen.
“Me thënë të drejtën ende nuk e kam të qartë qëllimin e manifestimit. Çka është dashtë të mbërrihet me të. Duhet të shikojmë situatën gjithëpërfshirëse dhe pse jemi në këtë fazë. Pse Kosova? Pse ata njerëz janë në gjykatë? Pse është krijuar ajo gjykatë?”, tha ai në T7.
“Është një organizim nga armiqtë që janë kundër shtetit të Kosovës, kundër luftës dhe kundër UÇK-së. Ka pasur një angazhim të madh prej raportit të Dick Martyt dhe pastaj të tjerëve. Qeveria që ka qenë atëherë e ka pasur të vështirë të përballet me të. Shumë nga njerëzit që kanë qenë në qeveria atëherë janë në Hagë tani. Qeveria e atëhershme e ka pasur të vështirë që të luftojë këtë propagandë dhe agjendë”, shtoi ai.
Tutje ai tha se LDK-ja janë për vënien në vend të drejtësisë.
“Pastaj kemi edhe vrasjen e njerëzve të pafajshëm. Këto kanë ndodhur në raste të pazbardhura. Ne si LDK jemi që drejtësia të vendoset në vend”, përfundoi ai.
Lidhja Demokratike e Kosovës nuk e përkrahu publikisht Marshin për Drejtësi të organizuar nga Partia Demokratike e Kosovës, i mbajtur më 2 prill, një ditë para nisjes së gjykimit ndaj katër ish-krerëve të UÇK-së
