Pallto krem, pantallona të zeza dhe taka – një formulë klasike që aktorja e mban prej vitesh
Pas mbërritjes në aeroportin “John F. Kennedy” në New York, aktorja kaloi nëpër terminal me një kombinim që do të përshtatej po aq mirë edhe për një takim pune apo një drekë në qytet.
Pa ngjyra të forta dhe pa detaje të tepërta, ajo kombinoi një pallto krem, pantallona të zeza dhe këpucë me taka, ndërsa syzet e errëta të diellit kompletuan pamjen me të cilën prej kohësh identifikohet.
Palltoja krem dhe pantallonat e zeza – baza e elegancës
Në qendër të kombinimit ishte palltoja krem, një pjesë që edhe veshjes më të thjeshtë i jep menjëherë një pamje më serioze dhe elegante.
E kombinuar me pantallona të zeza dhe taka, Angelina tregoi edhe një herë se sa efektshëm mund të duket bashkimi i pjesëve klasike, pa qenë nevoja që i gjithë stili të ndërtohet mbi trendet e momentit.
Në dorë mbante një çantë të madhe në ngjyrë të çelët nga shtëpia e modës Givenchy, si dhe një çantë tjetër. Kështu, pamja e saj në aeroport kishte edhe një anë praktike, me hapësirë të mjaftueshme për gjërat që dëshiron t’i mbajë pranë gjatë udhëtimit.
Palltoja dhe çanta në nuanca të çelëta krijuan kontrast me bazën e zezë, ndërsa pjesa tjetër e kombinimit mbeti e përmbajtur. Pikërisht ky është stili që Jolie e kultivon prej vitesh: ngjyra neutrale, pjesë të thjeshta dhe aksesorë që bien në sy pa e tepruar.
Në të njëjtën kohë erdhi edhe lajmi për vajzën e saj
Mbërritja e saj në New York përkoi me lajmin se një gjykatë në Kaliforni kishte miratuar kërkesën e Zaharës, vajzës së Angelina Jolie dhe Brad Pitt, për ta hequr mbiemrin e të atit nga emri i saj.
Emri i saj tani figuron zyrtarisht Zahara Marley Jolie. Ajo është fëmija i tretë nga gjashtë fëmijët e ish-çiftit që ka hequr ligjërisht mbiemrin Pitt, pas Shiloh dhe Maddox.
Vetë ndryshimi i mbiemrit nuk nënkupton ndërprerje juridike të lidhjeve familjare, ndonëse ka tërhequr vëmendje të madhe publike.
Në aeroport, megjithatë, në plan të parë ishte stili i Angelina Jolie: i thjeshtë, elegant dhe plotësisht në përputhje me estetikën që ajo e kultivon prej vitesh.
/Telegrafi/