Udhëheqësja e opozitës suedeze, Magdalena Andersson, tha të martën se ajo deri më tani nuk ka mundur të formojë një qeveri pas zgjedhjeve të shtatorit, por mbeti e gatshme të përballet me një votim parlamentar për kandidaturën e saj për kryeministre, sipas transmetuesit publik.
Blloku i qendrës së majtë i Andersson fitoi ngushtë zgjedhjet e shtatorit me 176 vende kundrejt 173 të koalicionit të krahut të djathtë, por mbetet i ndarë mbi përbërjen e qeverisë së re.
Duke folur pas takimit me kryetarin e parlamentit, Andreas Norlen, udhëheqësja e Partisë Social Demokrate tha se negociatat kishin bërë përparim, por nuk kanë prodhuar mbështetje të mjaftueshme.
“Vlerësimi im i përgjithshëm është se është bërë përparim, por që aktualisht nuk ka kushte për formimin e një qeverie që mund të tolerohet nga Riksdag”, tha ajo, sipas SVT.
Andersson theskoi se tani i takon kryetarit të konsultohet me drejtuesit e tjerë të partisë dhe të vendosë se si të vazhdojë.
“Kam informuar kryeparlamentarin se jam gati për një votim për kryeministrin”, tha ajo, duke shtuar se votimi në këtë fazë do të kishte të bënte me një qeveri të përbërë vetëm nga socialdemokratët.
Nënkryetarja e Partisë së Majtë, Ida Gabrielsson, tha se partia e saj do të kundërshtonte një qeveri të tillë.
E zëdhënësja e Partisë së Gjelbër, Amanda Lind, përsëriti preferencën e partisë së saj për një qeveri të shumicës që përfshin të katër partitë, duke thënë se diskutimet kanë avancuar, por nuk është arritur asnjë marrëveshje.
Andersson u kërkoi palëve të veprojnë në mënyrë konstruktive dhe të përqendrohen në politikë, duke theksuar se askush nuk mund të presë të sigurojë të gjitha kërkesat e saj. /AA/