Ambasadori italian në Kosovë, Antonello De Riu, ka deklaruar se marrëveshja e arritur në Bruksel, mes kryeministrit Albin Kurti dhe presidentit Aleksandar Vuçiq, ishte hap i duhur, por që nuk finalizon gjithçka.
De Riu shpjegoi se, nëse Kosova dhe Serbia duan që marrëveshja e arritur të funksionojë, propozimi evropian duhet nënshkruar, jo thjesht të pranohet deklarativisht.
Ambasadori italian, në veçanti theksoi kërkesën drejtuar kryeministrit Kurti, për themelimin e Asociacionit të komunave me shumicë serbe.
”U është kërkuar të dyja vendeve, sepse të dyja vendet, si Kosova edhe Serbia, nuk e kanë nënshkruar këtë marrëveshje bazë, e cila megjithatë parashihte një aneks dhe pasi këto dy dokumente nuk u nënshkruan, sot për sot, mund të flasim për një deklaratë politike, pra ka një angazhim nga të dy liderët për të çuar përpara parimet që janë vendosur në marrëveshjen bazë. Por, që marrëveshja bazë të funksionojë duhet dhënë edhe pëlqimin për atë dokument që përcakton hapat që do të bëjnë të mundur zbatimin e marrëveshjes. Prandaj, është një angazhim për të dy, veçanërisht për kryeministrin kosovar është kërkesa që të vazhdohet me krijimin e Asociacionit të Komunave me Shumicë Serbe”, deklaroi ambasadori italian në Klan Kosova.
De Riu tutje tha se Italia e ka mbështetur iniciativën e BE-së, për të normalizuar raportet mes të dy palëve, duke thënë se janë të gatshëm të kontribuojnë në arritjen e këtij objektivi.
”Ne kemi mbështetur me bindje aktivitetin e kryenegociatorit të Bashkimit Evropian, ambasadorit Lajçak dhe, nëpërmjet këtij operacioni, duam të arrijmë dhe të japim kontributin tonë efektiv në normalizimin mes dy vendeve, që janë shumë të rëndësishme për Italinë”, deklaroi ai.
”Siç është theksuar disa herë, si nga kolegët e mi, ambasadorët e Quintit këtu, në intervistat e mëparshme, por mbi të gjitha në nivel të Brukselit dhe kryeqendrave, kjo marrëveshje, në të vërtetë është një marrëveshje pragmatike, le të themi, merr parasysh situatën aktuale. Në situatën aktuale, sinqerisht ishte maksimumi që mund të arrihej, por është një fazë e ndërmjetme sepse është e qartë se për të vazhduar drejt integrimit të tyre evropian, si Serbia ashtu edhe Kosova do të duhet të arrijnë një moment, në të cilin do të vendoset njohja reciproke”.
Ambasadori po ashtu e konsideroi veten me fat që është i angazhuar në Kosovë. Sipas tij, Kosova ka ndryshuar shumë, duke iu afruar dukshëm standardeve të shteteve perëndimore.
”E konsideroj veten shumë me fat që më kanë dërguar këtu në Kosovë si ambasador, pasi kam pasur rastin ta njoh këtë vend në fazat e ndryshme të historisë së tij të fundit, pas pavarësisë, ose më saktë pas çlirimit në 1999, në korrik, por edhe më pas. Në vitin 2009, jam rikthyer për të negociuar një marrëveshje bashkëpunimi me Kosovën, pra me qeverinë e re, në shtetin e pavarur. Dhe më pas, në vitin 2021, padyshim gjeta një vend që është thellësisht i ndryshëm nga ai që kam njohur në 10 vitet e para, një vend që është shumë më afër standardeve tona, një vend thellësisht tolerant dhe prandaj jam shumë i kënaqur për zgjedhjen time”, tha ai.