Kandidati për deputet nga radhët e PDK-së, Arben Gega, ka prezantuar pikat kryesore të angazhimit të tij për sektorin e ndërtimit, duke theksuar se përvoja e tij profesionale shumëvjeçare si ndërtues do të jetë bazë e punës së tij në Kuvendin e Kosovës.
Gega, i cili njihet si një nga ndërtuesit më të mëdhenj në Suharekë dhe Prishtinë, tha se aktiviteti i gjatë në këtë sektor i ka dhënë njohuri të drejtpërdrejta mbi sfidat me të cilat përballen qytetarët, punëtorët dhe vetë ndërtuesit.
Në një video të publikuar në rrjetet sociale, ai deklaroi se si deputet do të angazhohet për fuqizimin e komunave, në mënyrë që pranimet teknike të objekteve të përfundojnë pa vonesa dhe bllokada të panevojshme, duke u mundësuar qytetarëve marrjen e fletave poseduese në kohë.
Po ashtu, Gega theksoi nevojën për rritjen e numrit të inspektorëve të punës, me qëllim që punëtorët e ndërtimit të kenë më shumë siguri dhe mbrojtje në vendin e punës.
Ai paralajmëroi edhe inicimin e dixhitalizimit të plotë të procesit të lejeve të ndërtimit në të gjithë vendin, duke kërkuar një sistem të unifikuar për të gjitha komunat.
“Do të jem deputeti më i zëshëm që qytetarët të kenë fleta poseduese, punëtorët siguri dhe ndërtuesit rregull e barazi,” deklaroi Gega, duke shtuar se sektori i ndërtimit ka nevojë për rregull, përgjegjësi dhe barazi për të gjithë.
