Me shumicë votash, anëtarët e Kuvendit Komunal të Kaçanikut kanë zgjedhur Selajdin Tronin në postin e Kryesuesit të Kuvendit Komunal.
Zgjedhja u bë në vazhdimin e mbledhjes së Kuvendit të Komunës së Kaçanikut, të mbajtur më 8 dhjetor 2025, ku si pikë e vetme e mbetur e rendit të ditës ishte zgjedhja e kryesuesit.
Seanca u drejtua nga anëtari më i vjetër i Kuvendit, Xhelal Dema, ndërsa i pranishëm ishte edhe kryetari i Komunës së Kaçanikut, Sabedin Vishi.
Në fjalën e tij pas zgjedhjes, Selajdin Troni falënderoi asamblistët për besimin e dhënë, duke theksuar se posti i kryesuesit përfaqëson një përgjegjësi të madhe institucionale.
Ai u zotua se do të ushtrojë detyrën me paanësi, profesionalizëm dhe bashkëpunim me të gjitha grupet politike të përfaqësuara në Kuvend.
“Ky nuk është vetëm privilegj, por edhe obligim për të punuar pa anësi dhe në shërbim të qytetarëve. Kuvendi Komunal është zemra e vendimmarrjes lokale dhe vendi ku duhet të bashkojmë forcat për të mirën e përbashkët”, deklaroi Troni.
Selajdin Troni ka qenë anëtar i Kuvendit Komunal edhe në mandatin e kaluar nga radhët e Partisë Demokratike të Kosovës dhe është djali i Heroit të Kosovës, Izahir Troni. /Telegrafi/
