Këngëtarja amerikane, Taylor Momsen, ka përfunduar në spital pasi u pickua nga një merimangë helmuese gjatë turneut të saj në Meksikë.
Momsen ndodhet aktualisht në turne me grupin e saj The Pretty Reckless, i cili po performon si grup mbështetës për legjendarët AC/DC.
Ngjarja ndodhi gjatë qëndrimit të saj në Meksikë, ndërsa vetë këngëtarja tregoi në rrjetet sociale se ishte detyruar të kërkonte ndihmë mjekësore pas pickimit.
Ajo publikoi në Instagram foto të këmbës së dëmtuar dhe bëri të ditur se, pavarësisht dhimbjeve dhe qëndrimit në spital, kishte planifikuar të vazhdonte me koncertet.
Një ditë më vonë konfirmoi se kishte kaluar natën në spital, ku mori trajtimin e nevojshëm nga mjekët.
Sipas saj, pickimi i merimangës shkaktoi një reagim të fortë në organizëm, duke e detyruar të merrte një injeksion para një performance në Mexico City.
Megjithatë, ajo arriti të ngjitet në skenë dhe të vazhdojë turneun pavarësisht gjendjes shëndetësore.
Kjo nuk është hera e parë që Momsen përballet me incidente të pazakonta.
Më herët, gjatë një koncerti në Spanjë, ajo u pickua nga një lakuriq nate, çka tërhoqi vëmendje të madhe mediatike. /Telegrafi/