Komuniteti sportiv italian pësoi një goditje të rëndë pas humbjes së Azzurrëve ndaj Bosnjës dhe Hercegovinës në finalen e play-off-it për Kupën e Botës 2026 në Bilino Polje.
Skuadra e drejtuar nga Sergej Barbarez triumfoi pas penalltive me rezultatin 4-1, duke lënë Italinë jashtë turneut për herë të tretë radhazi.
Ky dështim nuk prek vetëm prestigjin dhe historinë e skuadrës katër herë kampione botërore, por ka shkaktuar edhe humbje financiare të konsiderueshme.
Sipas llogaritjeve të Gazzetta dello Sport, Federata Italiane e Futbollit ka humbur të paktën 100 milionë euro nga tre eliminimet radhazi, ku pjesa më e madhe, rreth 45 milionë euro, i referohet moskualifikimit për Kupën e Botës 2026.
Humbja përfshin: 9 milionë euro nga bonusi minimal i pjesëmarrjes së FIFA-s, 16 milionë euro nga gjobat e sponsorëve dhe të drejtat e humbura të shitjes së produkteve dhe 20 milionë euro nga pozicioni i dobët në negociatat me partnerët për periudhën e ardhshme.
Disfata kundër Bosnjës pasqyrohet edhe në nivel institucional. Presidenti i Federatës Italiane të Futbollit, Gabriele Gravina, dha dorëheqjen menjëherë pas ndeshjes, ndërsa jo shumë kohë më vonë, edhe Gianluigi Buffon, kreu i delegacionit italian, dha dorëheqjen.
Pritet që edhe trajneri i Azzurrëve, Gennaro Gattuso, të japë dorëheqjen zyrtarisht nga pozicioni i tij, duke hapur një epokë të re në drejtimin e kombëtares italiane pas një humbjeje historike. /Telegrafi/