Ministrja e Industrisë, Ndërmarrësisë dhe Tregtisë, Mimoza Kusari-Lila, njoftoi sot në Kuvend se në dy ditët e fundit janë paraqitur 206 kërkesa për verifikimin e njehsorëve elektrikë, duke treguar rritje të interesimit dhe vetëdijes së qytetarëve për këtë çështje.
Ministria, përmes Agjencisë për Metrologji, ka themeluar një grup punues ad-hoc në bashkëpunim me Inspektoriatin Qendror të Tregut, i cili po merret me kontrollin dhe verifikimin e njësive matëse.
Procesi ka nisur dhe do të vazhdojë me transparencë të plotë, ndërsa çdo rezultat do të publikohet dhe çdo rast do të trajtohet sipas ligjit.
Ligji për Metrologjinë parashikon masa dhe sanksione të qarta për shkeljet, qoftë nga individë apo subjekte, dhe të gjitha të dhënat do t’i transmetohen edhe Zyrës së Rregullatorit për veprime të mëtejshme.
Ministrja Kusari-Lila siguroi qytetarët se mbrojtja e konsumatorit dhe transparenca mbeten prioritetet kryesore të Ministrisë.