Tottenham po shqyrton seriozisht emërimin e Xavi Hernandez si trajner të ri, pas shkarkimit të Thomas Frank.
Klubi londinez ndodhet në një situatë të vështirë në Ligën Premier, vetëm pesë pikë larg zonës së rënies nga kategoria.
Drejtuesit kërkojnë një ndryshim të menjëhershëm për të shmangur një sezon zhgënjyes dhe për të rikthyer stabilitetin në skuadër.
Në zyrat e klubit, Xavi shihet si më shumë sesa një zgjidhje afatshkurtër.
Filozofia e tij, e bazuar në posedim, presion të organizuar dhe ndërtim të aksioneve nga mbrojtja, përfaqëson një qasje të re për “Spurs”.
Megjithatë, sfida do të ishte e madhe, skuadra po kalon një periudhë të vështirë, me rezultate negative dhe një moral të lëkundur në dhomat e zhveshjes.
Xavi do të duhej të sillte rezultate të menjëhershme, ndërsa paralelisht të ndërtonte një model të ri loje në një kampionat shumë konkurrues si Liga Premier.
Për ta bindur trajnerin spanjoll, Tottenham është gati të ofrojë një kontratë të majme dhe garanci për vendimmarrje në aspektin sportiv.
Që prej largimit nga Barcelona, Xavi ka refuzuar disa oferta, duke theksuar se do të rikthehet vetëm për një projekt serioz dhe me vizion të qartë.
Deri tani, Xavi ka ruajtur heshtje për të ardhmen e tij.
Në Londër besojnë se ai është profili i duhur për të rindërtuar klubin dhe për t’i dhënë një drejtim të ri skuadrës.
Mbetet për t’u parë nëse ai do ta pranojë sfidën, por Tottenham duket i vendosur të ndërtojë të ardhmen rreth tij. /Telegrafi/