Australia po shënon një pikë kthese në tregun e automjeteve, pasi për herë të parë makinat e elektrifikuara kanë tejkaluar shitjet e atyre me benzinë brenda një muaji.
Sipas raportimeve, në dhjetor u shitën 35,058 automjete hibride, plug-in dhe plotësisht elektrike, krahasuar me 34,559 makina me benzinë.
Gjatë gjithë vitit, automjetet e elektrifikuara arritën në 355,887 njësi, duke zënë 28.6 për qind të tregut, ndërsa makinat plotësisht elektrike përbënin 8.3 për qind.
Rritja po nxitet kryesisht nga prodhuesit kinezë si BYD, Geely, MG, Xpeng dhe Zeekr, të cilët po fitojnë terren në Australi.
Megjithatë, makinat me benzinë mbeten ende segmenti më i madh i tregut me 38.3 për qind, ndërsa dizeli mban 29.4 për qind.
Krahasuar me vitin 2015, kur benzina dominonte me 67 për qind, të dhënat tregojnë një ndryshim të madh në preferencat e konsumatorëve dhe sinjalizojnë se viti 2026 mund të jetë i pari ku automjetet e elektrifikuara dominojnë tregun. /Telegrafi/