Një ngjarje e rëndë është parandaluar në Libohovë, falë ndërhyrjes së menjëhershme të Policisë.
Një 40-vjeçar është arrestuar pasi ka kërcënuar bashkëshorten e tij se do ta vriste me armë zjarri automatike, ndërsa gjatë largimit ka qëlluar disa herë në ajër, transmeton IndeksOnline.
Sipas njoftimit zyrtar të Policisë së Shtetit, ngjarja ndodhi mbrëmjen e djeshme, pas një konflikti për motive të dobëta mes çiftit.
Shërbimet e Komisariatit të Policisë Gjirokastër, Stacionit të Policisë Dropull-Libohovë dhe Forcës së Posaçme “Shqiponja” ndërhynë menjëherë për parandalimin e një ngjarjeje të mundshme kriminale.
Pas rreth 2 orësh e 30 minutash negociatash me Policinë, u bë i mundur neutralizimi dhe arrestimi në flagrancë i 40-vjeçarit.
Gjatë ndërhyrjes, Policia sekuestroi një armë zjarri automatike, e cila kishte fishekë në folenë e fishekut, si dhe një krehër me municionin përkatës.
Materialet procedurale i janë referuar Prokurorisë për veprime të mëtejshme.

