Ish-reprezentuesi i Spanjës dhe një prej mesfushorëve më të dalluar të gjeneratës së tij, Juan Mata, ka njoftuar zyrtarisht pensionimin nga futbolli profesionist në moshën 38-vjeçare.
Përmes një mesazhi emocional lamtumire, spanjolli i ka dhënë fund një rrugëtimi të pasur plot suksese dhe trofe të mëdhenj në arenën evropiane dhe botërore, shkruan IndeksOnline.
“Ndonjëherë, të duash… do të thotë të lësh të shkojë. FALEMINDERIT FUTBOLL”, ka shkruar Mata në njoftimin e tij.
Gjatë karrierës së tij të shkëlqyer, ku ndër të tjera veshi fanellat e klubeve të njohura si Valencia, Chelsea, Manchester United dhe Galatasaray, Mata fitoi pothuajse gjithçka që mund të fitohet në futboll. Me Kombëtaren e Spanjës ai u shpall kampion i botës në vitin 2010 dhe kampion i Evropës në vitin 2012.
Ndërkaq, në nivel klubesh, ai ngriti lart trofeun e Ligës së Kampionëve (2012), dy trofe të Ligës së Evropës (2013 dhe 2017), dy kupa FA Cup në Angli (2012 dhe 2016), si dhe titullin kampion në Turqi në vitin 2023. /IndeksOnline/

