Gjatë vizitës zyrtare në Bruksel, kryetarja e Kuvendit, Albulena Haxhiu ka zhvilluar një takim me kryetarin e Senatit të Belgjikës, Vincent Blondel, me të cilin ka diskutuar për forcimin e marrëdhënieve ndërmjet Kosovës dhe Belgjikës.
Përmes një njoftimi në Facebook, Haxhiu bëri të ditur se gjatë takimit e ka falënderuar Belgjikën për mbështetjen e vazhdueshme ndaj Kosovës ndër vite, duke rikujtuar se ajo ishte ndër vendet e para që njohën pavarësinë e vendit.
Ajo tha se në takim është diskutuar për thellimin e bashkëpunimit ndërmjet Kuvendit të Kosovës dhe Senatit belg, veçanërisht përmes grupeve parlamentare të miqësisë, raporton IndeksOnline.
Haxhiu gjithashtu ka kërkuar që Belgjika të vazhdojë ta mbështesë Kosovën në rrugën e saj drejt anëtarësimit në Bashkimin Evropian dhe në Këshillin e Evropës.
Një tjetër çështje e diskutuar ishte bashkëpunimi në fushën e drejtësisë.
“U ndalëm edhe te bashkëpunimi në fushën e drejtësisë. Javën e kaluar, Kuvendi i Kosovës ratifikoi pa asnjë votë kundër Traktatin për Ndihmë të Ndërsjellë Juridike në Çështjet Penale me Belgjikën. Ky traktat do t’ua lehtësojë punën hetuesve dhe prokurorëve kur provat apo dëshmitarët ndodhen në vendin tjetër. Me Belgjikën na lidh një miqësi e gjatë, të cilën duam ta thellojmë më tej me hapa të tillë”, ka shkruar ajo.

