Bahreini njoftoi të dielën se kishte interceptuar dhe shkatërruar disa sulme ajrore iraniane, ndërsa Teherani pretendoi se kishte goditur një bazë ushtarake amerikane në këtë shtet të Gjirit Persik, në një kohë kur mbetet e paqartë nëse do të arrihet marrëveshje për t’i dhënë fund luftës mes SHBA-së, Izraelit dhe Iranit.
Këto ishin interceptimet e para nga mbrojtja ajrore e Bahreinit që nga shtatori. Ato pasuan dy paralajmërime për kërcënime të mundshme, përmes të cilave banorëve iu kërkua të kërkonin strehim, transmeton Telegrafi.
Trupat e Gardës Revolucionare Islamike të Iranit deklaruan se kishin sulmuar një bazë ushtarake amerikane në Bahrein, në shenjë hakmarrjeje ndaj “veprimeve armiqësore të SHBA-së”, raportoi agjencia iraniane e lajmeve Fars.
Ushtria e Bahreinit tha se sistemet e saj të mbrojtjes ajrore kishin interceptuar disa sulme iraniane para se ato të arrinin objektivat. Ajo akuzoi Teheranin se po vazhdonte “qasjen e tij sistematike armiqësore” ndaj mbretërisë.
Ndërkaq, Garda Revolucionare pretendoi se kishte lëshuar gjashtë dronë drejt radarëve amerikanë të mbrojtjes ajrore në bazën e helikopterëve Al-Rifaa në Bahrein, raportoi televizioni shtetëror iranian Press TV. Deri më tani nuk ka pasur konfirmim të menjëhershëm nga autoritetet amerikane apo ato të Bahreinit.
Bahreini, ku ndodhet Flota e Pestë e Marinës amerikane, u bëri thirrje qytetarëve dhe banorëve të qëndronin të qetë dhe të drejtoheshin drejt vendstrehimit më të afërt të sigurt, njoftoi Ministria e Brendshme.
Dy ditë më parë, Garda Revolucionare kishte deklaruar se kishte sulmuar një instalim amerikan të radarëve për paralajmërim të hershëm në Bahrein. Ushtria amerikane e mohoi këtë pretendim, duke thënë se kishte interceptuar dy dronë iranianë dhe se nuk ishte shkaktuar asnjë dëm.
Përpjekjet diplomatike për t’i dhënë fund konfliktit, i cili po hyn në muajin e nëntë, ende nuk kanë prodhuar ndonjë përparim konkret. Ndërkohë, sulmet sporadike po vazhdojnë, pavarësisht një periudhe më të qetë në luftimet mes SHBA-së dhe Iranit.
Lufta nisi më 28 shkurt, me sulmet amerikane dhe izraelite ndaj Iranit, për t’u përhapur më pas në gjithë rajonin. Teherani u kundërpërgjigj me sulme me raketa dhe dronë ndaj bazave ushtarake amerikane në vendet e Gjirit.
Presidenti amerikan, Donald Trump, ka deklaruar ditët e fundit se mund të përmbahet nga sulmet ndaj Iranit nëse Teherani dhe rebelët Huthi në Jemen, të mbështetur nga Irani, nuk ndërmarrin provokime të reja. Megjithatë, ai ka thënë se SHBA-ja do ta vazhdojë bllokadën detare, raportoi Reuters të shtunën.
Në një zhvillim tjetër, rebelët Huthi dhe koalicioni i udhëhequr nga Arabia Saudite, që lufton kundër tyre, kanë vazhduar shkëmbimin e sulmeve.
Koalicioni njoftoi të dielën se kishte interceptuar dy raketa balistike të lëshuara nga Huthit në drejtim të kryeqytetit saudit, Riad, si dhe tre dronë në Provincën Lindore të Arabisë Saudite, një rajon i pasur me naftë. /Telegrafi/