Kombëtarja e Kosovës dhe përzgjedhësi i saj Franco Foda kanë dorëzuar mëngjesin e sotëm (e shtunë) në UEFA listën zyrtare prej 23 futbollistëve për ndeshjen ndaj Izraelit.
Dardanët do të luajnë sot ndaj Izraelit në kuadër të raundit të pestë të Grupit 3 në Ligën B të Ligës së Kombeve, në ndeshjen e paraparë të zhvillohet nga ora 15:00 në stadiumin Fadil Vokrrit në Prishtinë.
Për këtë ndeshje, përzgjedhësi Franco Foda ftoi fillimisht 27 lojtarë, në mesin e tyre tre emra të rinj, por më vonë u liruan nga grumbullimi emra si Valmir Matoshi dhe Erblin Osmani, duke bërë që në vend të tyre të afrohet Betim Fazliji.
Në ditët pasuese, shkaku i shqetësimeve me lëndime u liruan edhe Lumbardh Dellova dhe Ermal Krasniqi, duke çuar në 24 numrin e lojtarëve të mbetur.
Megjithatë, në ndeshje zyrtare, ekipet duhet të dorëzojnë një liste prej 23 futbollistëve për ndeshje dhe kështu bëri edhe Kosova gjatë mëngjesit të sotëm (e shtunë).
Enis Rexhepi në stërvitje me Kosovën
Lojtari i vetëm që mbeti jashtë listës për ndeshjen e sotme është njëri prej prurjeve të fundit, sulmuesi 18-vjeçari i Stuttgartit, Enis Rexhepi.
Në sulm, Foda ka vendosur t’ju besojë për këtë ndeshje emrave si Vedat Muriqi, Fisnik Asllani, Baton Zabërgja, Edon Zhegrova dhe Albion Rrahmani. /Telegrafi/
