Bashkimi Evropian ka arritur marrëveshje për buxhetin e vitit 2027, i cili kap vlerën prej 199.7 miliardë eurosh apo 222.61 miliardë dollarë.
Shtetet anëtare të BE-së njoftuan të mërkurën në mëngjes se marrëveshja është arritur pas negociatave që zgjatën gjatë natës me Parlamentin Evropian.
Sipas një deklarate të përbashkët të vendeve anëtare, marrëveshja do t’i mundësojë bllokut prej 27 shtetesh të zbatojë politikat dhe programet e dakorduara, përcjell DPA.
Ajo gjithashtu synon të ruajë aftësinë e BE-së për t’u përballur me krizat dhe sfidat e vazhdueshme, përfshirë situatën në Ukrainë dhe Lindjen e Mesme, si dhe me zhvillimet e paparashikuara.
Buxheti për vitin e ardhshëm është pak më i lartë se ai i vitit 2026, i cili ishte rreth 190 miliardë euro.
Marrëveshja për vitin 2027 duhet ende të marrë miratimin zyrtar nga shtetet anëtare dhe Parlamenti Evropian, procedura që konsiderohen formalitete.
Buxheti i BE-së përcaktohet fillimisht përmes një kornize financiare 7-vjeçare, mbi bazën e së cilës hartohen buxhetet vjetore.
Meqenëse viti 2027 shënon përfundimin e ciklit aktual, në Bruksel po zhvillohen negociata të vështira për kornizën e ardhshme shumëvjeçare.
Shtetet anëtare ulin propozimin e Komisionit Evropian
Marrëveshja bazohet në propozimin e Komisionit Evropian, i cili kishte kërkuar një buxhet prej 199.9 miliardë eurosh për vitin e ardhshëm.
Ndër prioritetet kryesore të përcaktuara nga Komisioni ishin konkurrueshmëria ekonomike, siguria, mbrojtja dhe mbështetja për Ukrainën.
Negociata të vështira për buxhetin afatgjatë
Në kuadër të kornizës aktuale financiare shumëvjeçare, për periudhën 2021–2027 janë ndarë gjithsej rreth 1.1 trilion euro.
Buxheti i BE-së financohet kryesisht nga kontributet e shteteve anëtare, megjithëse mbetet dukshëm më i vogël krahasuar me shpenzimet e përgjithshme të buxheteve kombëtare.
Gjermania, kontribuuesja më e madhe neto në buxhetin evropian, siguron pothuajse 1/4 e fondeve të BE-së, por njëkohësisht përfiton ndjeshëm nga tregu i përbashkët evropian.
Ndërkohë, në Bruksel po vazhdojnë negociatat për buxhetin e ri shumëvjeçar për periudhën 2028–2034.
Vendet anëtare synojnë të arrijnë marrëveshje deri në fund të vitit, megjithëse ky objektiv konsiderohet shumë ambicioz për shkak të dallimeve të mëdha ndërmjet qëndrimeve të tyre.
Aktualisht, në tryezë është një propozim prej 1.826 trilion eurosh për periudhën e ardhshme 7-vjeçare.
Kancelari gjerman Friedrich Merz është ndër udhëheqësit që e kundërshtojnë këtë propozim, duke e cilësuar të papranueshëm dhe duke kërkuar shkurtime prej disa qindra miliardë eurosh.