Legjenda e futbollit francez, Zinedine Zidane, ka dalë në mbështetje të Kylian Mbappes pas zhgënjimit të këtij të fundit në garën për Topin e Artë 2026, duke vlerësuar se sulmuesi i Real Madridit e meritonte çmimin po aq sa fituesi Harry Kane.
Ish-trajneri i Real Madridit foli për emisionin “Telefoot” të dielën, ku pranoi se Mbappe natyrshëm është i zhgënjyer që nuk arriti ta fitojë çmimin më prestigjioz individual në futboll.
Për kapitenin e Kombëtares së Francës, vendi i dytë përbën rezultatin më të mirë në karrierën e tij në këtë garë, por trofeu përfundoi në duart e sulmuesit të Bayern Munichut, Harry Kane.
“Mbappe? Me siguri do të jetë i lumtur që është rikthyer te Kombëtarja e Francës. Në grumbullimin e parë ndodhi ashtu siç ndodhi, pasi u largua nga skuadra pas ndeshjes së parë kundër Turqisë për shkak të lëndimit. Me siguri ka dashur të qëndrojë me ne, por është një lojtar që luan shumë, prandaj duhet të kemi kujdes”, deklaroi fillimisht Zidane.
Duke folur për Topin e Artë, legjenda franceze nuk e fshehu mendimin se sulmuesi i Real Madridit kishte merituar të triumfonte.
“Topi i Artë? Secili ka preferencat e veta. Ai përfundoi i dyti dhe duhet ta pranojmë këtë. Natyrisht që është i zhgënjyer, sepse me siguri e meritonte po aq sa fituesi”, u shpreh Zidane./Telegrafi/