Shoqata e Radiologëve të Kosovës ka organizuar sot një para-simpozium shkencor, me rastin e Ditës Ndërkombëtare të Radiologjisë, që shënohet më 8 Nëntor 2026.
Tema e këtij edicioni ishte “Empowering Healthcare through Imaging Excellence”, transmeton IndeksOnline.
Aktiviteti është mbajtur në Qendrën Kombëtare të Telemjekësisë, ndërsa është akredituar nga Oda e Mjekëve të Kosovës me shtatë pikë pasive.
Simpoziumi ka përfshirë diskutime mbi organizimin profesional dhe zhvillimin e radiologjisë në Kosovë, si dhe prezantime shkencore nga profesionistë të kësaj fushe.
Në hapje të aktivitetit, kryetari i Shoqatës së Radiologëve të Kosovës, prof. dr. Jeton Shatri, ka folur për riorganizimin e shoqatës dhe planet për të ardhmen.
Simpoziumi është përmbyllur me një diskutim të hapur dhe pyetje nga pjesëmarrësit, ku janë trajtuar temat e prezantuara, zhvillimi i radiologjisë në vend dhe perspektivat e bashkëpunimit profesional e shkencor.