Në kuadër të vizitës së punës në Berlin, Zëvendëskryetari i Parë i Qeverisë dhe Ministër për Çështje Evropiane, Bekim Sali, zhvilloi takim me deputetin e Bundestagut gjerman, Peter Beyer, ku u diskutuan perspektiva evropiane e Maqedonisë së Veriut, zhvillimet e fundit në politikën e zgjerimit të Bashkimit Evropian dhe mundësitë për thellimin e bashkëpunimit ndërmjet dy vendeve.
Në qendër të bisedimeve ishte integrimi gradual në tregun e përbashkët evropian, si një mekanizëm që mundëson përfitime të prekshme për qytetarët dhe bizneset paralelisht me përmbushjen e reformave dhe avancimin drejt anëtarësimit të plotë.
Sali theksoi rëndësinë e qasjes së re të Komisionit Evropian për përgatitjen e një Bashkimi Evropian më të gjerë, duke nënvizuar nevojën që procesi i zgjerimit të jetë më dinamik, i parashikueshëm dhe i bazuar në merita.
“Integrimi evropian nuk duhet të fillojë vetëm në ditën e anëtarësimit. Qytetarët dhe bizneset tona duhet t’i ndiejnë përfitimet e afrimit me Bashkimin Evropian që tani. Integrimi gradual është mundësi për ta shndërruar perspektivën evropiane në rezultate konkrete, ndërkohë që vazhdojmë me reformat e nevojshme për anëtarësim të plotë”, theksoi Sali./Telegrafi/