Kryeministri i Shqipërisë, Edi Rama, ka përsëritur ftesën për dialog me studentët protestues, të cilët prej më shumë se 20 ditësh kërkojnë dorëheqjen e tij.
Përmes një postimi në rrjetet sociale, Rama ka publikuar pamje të tryezës së gurtë gjashtëkëndore, të vendosur para godinës së Kryeministrisë, mbi të cilën qëndrojnë letra me mbishkrimin “Dialog”.
Pavarësisht ftesave të vazhdueshme të kreut të qeverisë, studentët kanë refuzuar të ulen në bisedime, duke këmbëngulur në kërkesën për largimin e tij nga detyra.
Protestat kanë nisur më 13 tetor, fillimisht para Ministrisë së Arsimit, ndërsa më pas janë zgjeruar me pjesëmarrjen e studentëve, gjimnazistëve dhe qytetarëve të tjerë.
Në mbështetje të protestuesve janë bashkuar edhe pedagogë, të cilët kanë bojkotuar procesin mësimor.
Rama ka deklaruar më herët se qeveria është e gatshme të shqyrtojë propozimet dhe shqetësimet e studentëve, por deri më tani palët nuk kanë arritur marrëveshje për nisjen e dialogut.