Muzeu i Whitby-t dhe Galeria e Artit Pannett në Angli mund të kenë nevojë për investime deri në 200 mijë paund për riparimin dhe mirëmbajtjen e ndërtesës historike, pas shqetësimeve të ngritura për gjendjen e saj fizike.
Kjo shumë paraqet një rritje të konsiderueshme krahasuar me buxhetin aktual prej 18 mijë paundësh, të ndarë nga këshilli i qytetit për riparimet dhe mirëmbajtjen e përgjithshme të objektit.
Sipas një raporti të paraqitur para këshilltarëve, ndërtesa kërkon “investime të konsiderueshme”, ndërsa tashmë janë porositur një sërë inspektimesh të specializuara për të përcaktuar më saktë shkallën e ndërhyrjeve të nevojshme. Rezultatet e tyre do të shërbejnë si bazë për vendimet e ardhshme mbi investimet dhe për të vlerësuar koston afatgjatë të mirëmbajtjes së objektit.
Inspektimet do të përfshijnë vlerësimin e plotë të gjendjes së ndërtesës, kontrollet për praninë e azbestit, matjet arkitekturore të objektit, si dhe vlerësime të specializuara të sistemeve mekanike dhe elektrike.
Sipas të dhënave të publikuara nga Local Democracy Reporting Service, dokumentet e këshillit tregojnë se muzeu dhe galeria e artit kanë gjeneruar të ardhura prej 96,911 paundësh gjatë vitit, ndërsa shpenzimet për funksionimin e tyre kanë arritur në 154,685 paund. Për shkak të diferencës mes të ardhurave dhe kostove, këshilli është detyruar të sigurojë financim shtesë për të mbuluar deficitin.
Dokumentet gjithashtu sugjerojnë se për realizimin e punimeve të ardhshme mund të nevojitet edhe marrja e një huaje. Këshilltarët pritej të diskutonin buxhetin e propozuar të muzeut dhe galerisë, si dhe nevojat për investime në të ardhmen, në një mbledhje të planifikuar për këtë javë. Megjithatë, takimi është anuluar.
Vlerësimet e specializuara pritet të japin një pasqyrë më të qartë mbi gjendjen e ndërtesës dhe ndërhyrjet që do të nevojiten për ruajtjen e saj në vitet në vijim. /kultplus