FC Dinamo Ferizaj ka vendosur të ndërpresë bashkëpunimin me trajnerin e ekipit të parë, Leotrim Krasniqi, pas një serie rezultatesh jo të mira në Ligën e Parë të Kosovës.
Lajmi është bërë i ditur nga vetë klubi ferizajas përmes një njoftimi zyrtar, ku konfirmohet ndarja me trajnerin, të cilin e kanë falënderuar për angazhimin dhe kontributin e dhënë gjatë periudhës së tij në skuadër.
Vendimi vjen pas një periudhe të vështirë për Dinamon, e cila në pesë ndeshjet e fundit nën drejtimin e Krasniqit regjistroi tri humbje dhe dy barazime, pa arritur të shijojë fitoren.
Dinamo në vendin e shtatë me 20 pikë
Pas 13 xhirove të zhvilluara, Dinamo Ferizaj ka grumbulluar 20 pikë dhe renditet në pozitën e shtatë në tabelën e Ligës së Parë.
Seria negative e rezultateve ka bërë që drejtuesit e klubit të ndërmarrin ndryshime në stolin e trajnerit, me synimin për ta rikthyer skuadrën te rezultatet pozitive. Në njoftimin e tyre, ferizajasit kanë shprehur mirënjohje për punën e Krasniqit.
“Klubi e falënderon trajnerin Krasniqi për angazhimin, punën dhe kontributin e dhënë gjatë kohës sa ishte pjesë e skuadrës sonë. I urojmë shëndet dhe shumë suksese në vazhdim të karrierës profesionale”, thuhet në njoftimin e Dinamos.
Ndërkohë, mbetet të shihet se kush do të jetë trajneri i ri që do ta marrë drejtimin e skuadrës ferizajase në vazhdim të kampionatit. /Telegrafi/