Ish-gjyqtari katalanas Xavier Estrada Fernandez ka shkaktuar polemika me deklaratat e tij të fundit për strukturën e ndarjes së drejtësisë në Spanjë, duke pretenduar se mungesa e përfaqësimit të gjyqtarëve katalanas në elitën e futbollit lidhet me atë që ai e cilësoi si “urrejtje ndaj katalanasve”.
Estrada Fernandez, i cili në të kaluarën ka drejtuar ndeshje në La Liga, është bërë emër i njohur për kritikat e vazhdueshme ndaj Komitetit Teknik të Gjyqtarëve (CTA) dhe asaj që ai e konsideron korrupsion brenda këtij institucioni.
Duke folur në podkastin katalanas “La Reinaixença”, ish-gjyqtari u shpreh se numri i arbitrave nga Katalonia në elitën e futbollit spanjoll është shumë i vogël.
“Fatkeqësisht, ka shumë pak gjyqtarë katalanas në elitë”, deklaroi ai. Kur u pyet për arsyen, Estrada Fernandez drejtoi gishtin nga ajo që e përshkroi si “urrejtje ndaj katalanasve”.
Ai e mbështeti pretendimin e tij te të dhënat, duke theksuar se Katalonia ka numrin më të madh të licencave federative për futbollistë, trajnerë dhe gjyqtarë, por pavarësisht kësaj mbetet ndër rajonet më pak të përfaqësuara në nivelet më të larta të arbitrimit.
“Gjyqtarët që arrijnë në elitë apo që drejtojnë ndeshje ndërkombëtare mund t’i numërojmë me gishtat e njërës dorë”, shtoi ai.
Sipas ish-gjyqtarit, kjo situatë nuk është e re, por vazhdon prej dekadash. Ai bëri të ditur se në Kataloni janë të regjistruar më shumë se 2.000 gjyqtarë, por vetëm një numër shumë i vogël prej tyre kanë arritur në nivelet më të larta të ndarjes së drejtësisë.
Estrada Fernandez theksoi se gjyqtarët duhet të vlerësohen vetëm në bazë të aftësive dhe performancës së tyre, e jo në bazë të rajonit nga vijnë.
“Problemi që kemi është se gjyqtarët duhet të vlerësohen në bazë të aftësive të tyre dhe asnjëherë sipas rajonit prej nga vijnë, por kjo ndodh shumë shpesh”, përfundoi ai./Telegrafi/