Artisti shqiptar me famë ndërkombëtare, Anri Sala, sjell një botim të ri që trajton artin, historinë dhe kulturën shqiptare, duke vënë në qendër rëndësinë e dialogut dhe mendimit kritik në shoqëri.
Libri, i titulluar “Zëri i tretë”, pritet të dalë në librari gjatë muajit nëntor.
Përmes një reflektimi të gjatë në gjuhën shqipe, Sala dhe Bardhyli trajtojnë marrëdhënien mes artit, kujtesës, lirisë dhe historisë, si dhe rolin që kultura duhet të ketë në jetën publike.
Biseda nis nga arti bashkëkohor dhe përvoja e izolimit gjatë pandemisë së COVID-19, për t’u zgjeruar më pas drejt çështjeve që lidhen me përvojën individuale dhe kujtesën kolektive.
Sipas Balkanweb, botimi synon të nxisë një diskutim më të gjerë mbi përgjegjësinë e intelektualëve dhe nevojën për hapësira ku idetë mund të diskutohen lirisht.
Një pjesë e reflektimit lidhet edhe me historinë e Shqipërisë gjatë regjimit komunist, kur krijimtaria artistike dhe mendimi estetik kufizoheshin nga kërkesat ideologjike.
Në këtë kontekst, dialogu i lirë mbi artin dhe idetë paraqitet si shprehje e lirisë për të menduar, për të kundërshtuar dhe për të vënë në pikëpyetje bindjet e trashëguara.
Botimi trajton gjithashtu rolin e intelektualit në shoqërinë e sotme, në një kohë kur informacioni qarkullon me shpejtësi dhe debatet publike shpesh dominohen nga reagimet e menjëhershme, në vend të analizës së thelluar.
Sipas këtij këndvështrimi, përgjegjësia e intelektualit nuk qëndron vetëm në dhënien e përgjigjeve, por edhe në ngritjen e pyetjeve të duhura, sfidimin e bindjeve të konsoliduara dhe nxitjen e mendimit të pavarur.
Titulli “Zëri i tretë” simbolizon hapësirën që krijohet mes dy zërave përmes dëgjimit dhe shkëmbimit të ideve, duke mundësuar një perspektivë të re që nuk do të arrihej vetëm përmes qëndrimeve individuale.
Përmes këtij botimi, Anri Sala dhe Alda Bardhyli synojnë ta paraqesin artin jo vetëm si përvojë estetike, por edhe si mënyrë të të menduarit dhe të kuptuarit të shoqërisë.
Anri Sala është një nga artistët shqiptarë më të njohur në skenën ndërkombëtare të artit bashkëkohor. Krijimtaria e tij ndërthur imazhin, tingullin, kohën dhe kujtesën, duke e vendosur përvojën e tij artistike në dialog me çështje më të gjera kulturore dhe shoqërore./Telegrafi/