Cyrihu është ndër rajonet më të rëndësishme të diasporës shqiptare në Zvicër, ku ndër vite janë krijuar komunitete të konsoliduara, lidhje familjare dhe mundësi punësimi.
Sipas të dhënave të Zyrës Federale të Statistikave të Zvicrës, në vitin 2024 shqipja përbënte rreth 3 për qind të gjuhëve kryesore të popullsisë në vend.
Ndërkaq, të dhënat e publikuara nga Zyra e Statistikave e kantonit të Cyrihut tregojnë se në vitin 2018 rreth 45.500 persona mbi moshën 15-vjeçare në këtë kanton e kishin shqipen gjuhë kryesore.
Shqiptarët kanë emigruar drejt Zvicrës për disa dekada, fillimisht kryesisht për punë, ndërsa më vonë edhe përmes bashkimit familjar dhe migrimit të lidhur me luftën në Kosovë.
Sipas një studimi akademik të publikuar nga studiues të Universitetit të Neuchâtel-it, rrjetet familjare dhe shoqërore kanë luajtur rol të rëndësishëm në historinë e migrimit shqiptar drejt Zvicrës, transmeton Telegrafi.
Cyrihu dhe rajoni përreth ofrojnë mundësi punësimi në sektorë të ndryshëm, ndërsa prania e familjarëve dhe e një komuniteti të krijuar ndër vite mund ta lehtësojë vendosjen e të ardhurve të rinj.
Këta faktorë ndihmojnë të shpjegohet pse shumë shqiptarë e zgjedhin këtë rajon për të jetuar dhe punuar.
Megjithatë, shifrat e shqipfolësve nuk tregojnë numrin e saktë të shqiptarëve që jetojnë në Cyrih.
Statistikat gjuhësore nuk e matin drejtpërdrejt përkatësinë etnike dhe nuk përfshijnë domosdoshmërisht të gjithë personat me prejardhje shqiptare, veçanërisht ata që kanë marrë shtetësinë zvicerane ose që deklarojnë një gjuhë tjetër si gjuhë kryesore./Telegrafi/