Pesë ndeshje në program, të shpërndara në tri ditë – java e 12-të e Albi Mall Superligës së Kosovës pritet të sjell përballje interesante, me sfida të rëndësishme për ekipet.
Albi Mall Superliga e Kosovës vazhdon këtë fundjavë me ndeshjet e javës së 12-të, ku pesë përballje do të zhvillohen nga e premtja deri të dielën, në garën që po vazhdon të sjellë rivalitet në elitën e futbollit kosovar.
Java hapet të premten, më 30 tetor, me duelin mes Ballkanit dhe Drenicës, që zhvillohet nga ora 13:00 në stadiumin e qytetit në Suharekë. Ballkani do të synojë ta shfrytëzojë terrenin vendas, ndërsa Drenica do të kërkojë rezultat pozitiv në një udhëtim aspak të lehtë.
Të shtunën janë në program dy ndeshje. Drita përballet me Vushtrrinë nga ora 18:00, në stadiumin me bari artificial në Gjilan, në një takim ku gjilanasit do të synojnë të shfrytëzojnë përparësinë e fushës së tyre.
Ndërkohë, Llapi dhe Prishtina do të përballen nga ora 13:00 në stadiumin “Zahir Pajaziti” në Podujevë, në një duel që pritet të sjellë rivalitet mes dy skuadrave.
Dy ndeshjet e fundit të kësaj jave zhvillohen të dielën, më 1 nëntor. Malisheva pret Feronikeli ’74 nga ora 13:00 në stadiumin “Liman Gegaj”, ndërsa Dukagjini dhe Gjilani e mbyllin javën me përballjen që nis nga ora 17:00 në stadiumin “18 Qershori” në Klinë. /Telegrafi/