Barcelona po e konsideron largimin e Alejandro Baldes në afatin kalimtar të janarit si një mundësi për të krijuar hapësirë financiare për përforcime në repartin defensiv.
Sipas Diario Sport, drejtuesit katalunas besojnë se shitja e mbrojtësit të majtë mund t’i sigurojë klubit të ardhura të nevojshme për të ndërhyrë në tregun e transferimeve.
Humbjet ndaj Paris Saint-Germainit dhe Real Madridit, së bashku me krizën e lëndimeve, kanë shtuar urgjencën për përforcime në mbrojtje. Për këtë arsye, Barcelona po shqyrton mundësinë e një shitjeje të rëndësishme, ndërsa Balde është identifikuar si kandidati kryesor për t’u larguar.
Përveç paraqitjes së shkurtër në ‘El Clasico’, ku u aktivizua vetëm pas lëndimit të Xavi Espart, Balde nuk duket të jetë pjesë e planeve kryesore të trajnerit Hansi Flick.
Agjenti i futbollistit, Jorge Mendes, thuhet se është në bisedime aktive me klube të Serie A dhe Ligës Premier për të gjetur një destinacion të ri për klientin e tij në janar, nëse situata e tij te Barcelona nuk përmirësohet gjatë muajve të ardhshëm.
Megjithatë, 23-vjeçari mund të shpresojë që në ndeshjet e ardhshme të fitojë më shumë minuta dhe ta rikthejë besimin e Flickut, veçanërisht duke pasur parasysh opsionet e kufizuara që katalunasit kanë në mbrojtje për shkak të lëndimeve.
Ndërkohë, Barcelona po monitoron edhe disa alternativa për repartin defensiv.
Në listën e lojtarëve që po ndiqen janë mbrojtësi i ri i Stuttgartit, Finn Jeltsch, si dhe futbollisti i Juventusit, Andrea Cambiaso, i cili mund të luajë në disa pozicione të mbrojtjes./Telegrafi/