Një tragjedi e rëndë hekurudhore ka tronditur Spanjën, duke shkaktuar dhjetëra viktima dhe të lënduar.
Aksidenti ndodhi në linjën hekurudhore me shpejtësi të lartë Madrid–Andaluzia, pranë Urda-s, në provincën e Toledos.
Sipas bilancit të raportuar nga mediat spanjolle, aksidenti ka shkaktuar mbi 50 viktima dhe 176 të lënduar.
Ndërsa autoritetet po vijojnë punën për t'u ardhur në ndihmë të prekurve, bota e sportit është bashkuar në mesazhe ngushëllimi dhe solidariteti për familjet e viktimave.
Real Madridi dhe Barcelona shprehin ngushëllime
Ndër klubet e para që reaguan ishin Real Madridi dhe Barcelona, dy rivalët e mëdhenj të futbollit spanjoll.
Real Madridi publikoi një komunikatë zyrtare, përmes së cilës shprehu pikëllimin e thellë për tragjedinë dhe u përcolli ngushëllimet familjeve të personave që humbën jetën.
Klubi madrilen shprehu gjithashtu solidaritet me të lënduarit dhe mbështetje për ekipet e emergjencës që po punojnë në vendngjarje.
Edhe Barcelona shprehu ngushëllimet për viktimat dhe mbështetjen e saj për familjarët e tyre, duke u dëshiruar shërim të shpejtë të gjithë të lënduarve.
Në një moment të tillë dhimbjeje, rivaliteti sportiv është lënë mënjanë, ndërsa dy klubet janë bashkuar në mesazhet e tyre të solidaritetit.
Sevilla e mban një minutë heshtje, Federata i shtyn ndeshjet
Edhe Sevilla ka nderuar viktimat e aksidentit, duke mbajtur një minutë heshtje para stërvitjes së ekipit të parë.
Ndërkohë, Federata Spanjolle e Futbollit ka vendosur të shtyjë të gjitha ndeshjet e Kupës së Mbretit që ishin planifikuar të zhvilloheshin të mërkurën dhe të enjten. Në total, 24 ndeshje do të duhet të caktohen për data të tjera.
Vendimi vjen në shenjë respekti pas tragjedisë që ka prekur vendin, ndërsa mesazhe ngushëllimi kanë ardhur edhe nga klube dhe institucione të tjera sportive.
Në këto momente të vështira, bota e futbollit në Spanjë është bashkuar për të shprehur dhimbjen dhe për të qëndruar pranë familjeve të viktimave dhe të gjithë të prekurve nga kjo ngjarje tragjike. /Zëri