Dy 24-vjeçarë janë akuzuar për vepra penale që lidhen me sigurinë kombëtare, pas një incidenti të ndodhur muajin e kaluar në bazën ajrore britanike RAF Fairford.
Mohmed Abdulkarim dhe Nouman Essghir janë akuzuar në bazë të Ligjit për Sigurinë Kombëtare të vitit 2023, njoftoi Shërbimi i Prokurorisë së Kurorës (CPS) në Mbretërinë e Bashkuar, transmeton Telegrafi.
Frank Ferguson, kryeprokuror për Divizionin e Krimeve të Rënda dhe Kundërterrorizmit në CPS, tha se vendimi për ndjekjen penale të dy personave erdhi pas një hetimi të Policisë Kundërterrorizmit lidhur me incidentin në bazën RAF Fairford.
“Do të vazhdojmë të punojmë ngushtë me partnerët tanë, ndërsa ky hetim kompleks vijon”, deklaroi Ferguson.
Seanca e parë gjyqësore është caktuar të mbahet sot në Gjykatën në Westminster, Londër. /Telegrafi/